قال الرئيس المصري عبد الفتاح السيسي أن مصر على استعداد لدفع 100 مليار جنيه لميكنة الدولة وتحييد العامل البشري.

وقال السيسي خلال احتفالية تطوير ميناء الإسكندرية البحري: "أنا قولت للدولة من حوالي 4 سنين لو تقدروا تعملو ميكنة كاملة لمصر لكل الأنشطة بتاعتنا علشان نحيد العامل البشري وإجراءاته، ولو عاوزين 100 مليار جنيه ندفعهم، وحد يقولي تدفع 100 مليار جنيه في ميكنة؟

.. أيوه ندفعهم لأنه دولة زي مصر فيها 100 مليون شخص والعمل لو مميكن ميكنة كاملة حجم اللي بتشوفوه وتعانو منه مش هيبقى موجود، ولو فساد عاوزين تواجهوه بجد مش هيتواجه غير بكده.. إن البشر متتعاملش غير مع ماكينات".

وأضاف الرئيس المصري: "اتكلمنا قبل كده إنه النظام ده مادام ماشي في كل العالم مندخلهوش عندنا ليه، اللي هو بيخاطب الشركة المصدرة والقائم بعملية الاستيراد يبعتولنا الشحنة قبل ماتيجي وندي الموافقة عليها أو لأ قبل ما تتشحن من أصله، بدل ماتيجي وتتحط عندي في الميناء وتتساب وأتحمل مسؤوليتها.. البضاعة قبل ما تتشحن من البلد المصدر يكون المستورد عارف إنه البضاعة مش هتدخل وبالمناسبة مش هتنزل على الميناء أصلا.. الإجراء قد يكون صعب، ولكننا بنعمل إجراءات الدول المتقدمة بتعملها ومش هنبقى عجبة.. إحنا بنعمل اللي غيرنا سبقنا وعمله وإحنا بنحاول نحصله علشان نسهل على الناس ونضمن إنه الحاجات اللي بتخش بلدنا طبقا للمعايير ولو في حاجة فيها مخاطر مخدرات وغيرها هنسيطر عليها".

ومن جهة أخرى قال الرئيس المصري، عبد الفتاح السيسي : المصريون يقومون الآن بإنشاء المشاريع بنفسهم وبأموالهم. 

وقال  أيضا : "إحنا بنقيم دايما المسار اللي احنا ماشيين فيه واللي ممكن نمشي فيه، وكان الكلام قبل كده شوفو حد ييجي ويشتغل، ولكن احنا دلوقتي بنعمل حاجتنا وبفلوسنا، ويتكلف 10 أو 20 بنعمل.. إحنا طبعا عاوزين المشغلين معانا والمستثمرين، ولكن علشان نسهل علينا وعليهم بنعمل".

كما أعرب السيسي عن شكره للحكومة على "جهدها والعمل الجاد"، معلقا على سرعة انتهاء الأعمال: "أنا مستعجل أكتر من كده معاكو علشان نقدر نحقق اللي انتو عاوزينه، وهقف عند تطوير ميناء الإسكندرية والسخنة، وهقول لينا في مصر وللحكومة على مدى سنين طويلة فاتت، كنا لما بنيجي نتكلم على مشروعات زي كده كنا بنطلب مستثمرين، زي ميناء دمياط وغيره، وكنا بنقولهم يدخلو يشتغلو، وده مسار الدولة مشيت فيه قبل كده".

وأضاف : "الميناء بتاع السخنة لو استمرينا على إننا ندور على مطورين، كنا ممكن نخلصه في 2030، ولو حد يقدر يشتغل ويخلصه في سنة يتفضل، والدولة المصرية الآن لها مسار مختلف عما كان، والهدف هو امتلاك قدرة حقيقية ومقومات اقتصاد حقيقية وتستفيد من موقعها، وقولنا نعمل مجموعة موانئ على البحر الأحمر ومجموعة موانئ على البحر المتوسط، ثم شبكة طرق".

وأكمل: "في طريق بيتعمل غرب الميناء، وهو محور التعمير، علشان نعمل كل حاجة وتمهد للمستثمر، وكل اللي بنقول عليه بنفذه وزيادة، وميناء زي ميناء السخنة هيتكلف حوالي 30 مليار جنيه، واللي شغاله فيه شركات مصرية كلها، والتكريك المصريين اللي بيعملوه، بتخرج الفلوس من جيب المصريين تدخل في جيبهم في حتة تانية، ثم تديني كيان على البحر الأحمر بالمستوى ده، اللي في تقديري ممكن نكون اتأخرنا على ما نوصله".

المصدر: "الوطن المصرية "