نيروز الإخبارية :
النائب الأسبق ميسر السردية
منذ مدة ليست طويلة أنتظر يستشيرني أحد ، لاتهمني طبيعة الإستشارة- سمك لبن تمر هندي - المهم إطلق العنان لرأيي الذي يتفلت في محبسه.
صارت "صديقة.بين ليلة وضحاها وبدون مقدمات " رجُلة أعمال" هذا المصطلح طبعا أُناغشها به ليغيضها، بكل كبرياء ترى نفسها في هذه اللحظة سيدة أعمال وافية الملامح. قررت الشروع بإفتتاح محل للملابس مستعملة، من وجهة نظرها هذه التجارة الأكثر رواجا في البلد هاليومين - يلعن أبو الفقر شو بيذل- السيدة "ع" تريد حصافتي وآرائي في عدة أمور ذات علاقة بالموضوع، منها اختيار اسم المحل الذي تعده ركيزة في جذب الزبائن.
قلت اروح مقاطعة طربق طربق مع الفلايح، منه أسرع ومنه اريح رأسي من شخف السيارات، بصراحة لسه اخاف من السيارات ولما اقطع الشارع أهرول هرولة.
يا الله ما أحلاه، خنفوس إصغير بيتكعبل بين العشبات- كل شي حلو وهو صغير- تذكرت زمان قرابة تغني وهي تغسل صوف "لطلع ع الجبل وأهيِل حجارهُ وأبو الخنافس ياريتن جارهُ" ياربي، ليش بدها تعيش مع خنفوس؟!.. آثاري كاينه موضة سوالف الشعر للشباب بالسبعينات، مثل فرقة البيتلز الأمريكية، أكيد بتعرف ا هاي الموضة.
وكمان هاي دودة أبو قطيفة الصفرا والسودا، يادوب قادرة تنط حالها ياخطية، كانت تقول الناس "إن شفت أبو قطيف حط الزبدة ع الرغيف" إشارة لبدء موسم الحليب والخضيض، بس أبو قطيف هذا اللي لقيته، إرفيع كأنه معه سوء تغذية، يمكن موسم السنة مو عال العال، الله يعين مربي الماشية، من وين لاقوها وللا من وين.. صدق من قال "يا مربي الضأن يا مهوي.. تركض وركضك على الفاضي.. يبلاك بمنخفض جوي.. يجيك وللا العلف قاضي"..
صوت ينادي، هذا عبدالرزاق، إيه، من وين اتخولق... هلا عبود.
وين رايحة. اليوم موعد العلب.. عبد الرزق من اصدقائي البرولتاريا المعدمة، بيننا اتفاق، حيث يأتي كل مدة لأخذ علب المشروبات الغازية وقطرميزات القهوة التي اجمعها له، بدل رميها في النفايات، هذه مهنته التي يعتاش منها، صحيح ولا مرة تذكرت أسأله وين يروح بالقطرميزات؟.
عندي مشوار، شو رأيك مرة ثانية، لا يا خيتي، ما تقدر أظل أمشّورّ ع كم مخفوسة. منتي ساكنة بآخر ماعمر الله.
أنت ليش ملزق بهالمنطقة؟ ماتروح تجرب حظك بمنطقة محرزة بلكن رزقتها أدسم شوي.
مثل وين؟ تعرفِ أماكن مدسمة؟
قَوطر عبدون، دير غبار، هذيك فيها ناس مليانة، .اكيد بيصرفوا أكثر واكلهم بدو تهضيم أكثر وحاوياتهم غير عننا.
تلفت من حوله كمتوجس، من كل عقلك، هاي مناطق حساسة، ما بنراح عليها..
- يقصف عمرك، حساسة بشو ؟!
- كلها سفارات، ودولة وناس من اللي فوق.
-كيف يعني؟ مو مثلنا شعب؟..
-لا مو مثلنا...
معقول يا عبود في ناس شعب وناس مش شعب بالبلد؟! ماحبيتها .. كرز جبهته.... اصلا هون العلب أكثر، وبعرف كل الحارات والمحلات وبعرف الناس كلهم كبار وصغار بعد.
دخلت صالون بيت التاجرة المستجدة، رائحة تفوح من رزم البالات، اغاني وطنية تهز قضبان الشبابيك، دب في الحماس، لو لا شوية العقل كان حوشينا، صحيح شو علاقة أغاني - المؤسسات-بإفتتاح المحلات؟!! .. مدري.
حكينا خربط بربط .. بلا فلسفة عاد ، شو رأيك اسميه فاميليا للملابس الأوروبية.
-بصراحة اخالفك الرأي، لازم تسمية شماشيل الشعب، صدقيني الناس بينها وبين حالها، تحب الأشياء التي تنتمي لوعيها وبيئتها مهما شطحت ونطحت.
"لا تحطِ لي بالرز بصل" فكك من عك السياسة ، هذا باب رزق، مش قبو تنظيم سري... عايفة المعاقطة حبيبتي.
حسيت حالي حميت، تستفزني ردها عن جد.
- اصلا يا مدام، كلمة ملابس أوروبية فيها التفاف على الحقيقة، يعني جانبك مش مستوردة بضاعتك من مخيطة شانيل وخواجات الموضة بأوروبا .. على رأي جدتي، خوف قلبي يطلعن هدوم موتى... تذابخنا.. صُلنا وجُلنا..
مع ذلك أنا ديمقراطية بعض الشئ ، بس بتحمل بالنقاش حدا يقعد لي ع ركبة ونص ، لطيت فنجان القهوة وقمت.. يابنت استنى الغدا، عاملة دوالي، بتحبيها..
كبرت برأسي.. مع اني طالعة ع لحم بطني،، وبنخ عند الدوالي،وبس ارجع مش طابخة، كنت مركنة عليها، كان ممكن أغير رأيي.. بس نو وي..تهبا، نفسي مو ردية،...تستاهلي، شو مطلعك من دارك يا أم إستشارات أنت.
مريت ع محل" لقمة هنية" طقيت إلىّ فيه نصيب ثمن حمص وفول وفلافل..معلش العوض على الله، مليح اللي مافي محل شورما بطريقي، وهات قيس طول السندويشة واضلاعها، معينة وللا منشورية.. .. عفكرة مش بعيد مستقبلا تصير عزومة وجوه الربع عشاورما.!! . وأنا بفكر بحالي و بمستقبل الأمن الغذائي للمتعوسين بدنيا القهر والقسر، مرت من حدي سيارة تدحل دحل، سايقها مسلطن.." حاطط أغنية الود دا حلو سابق سنو".... وتيتي تيتي.. شو ما حكيتِ..وهاي إستشارة بخسارة... صديقتي معها حق، أحنا
بنحب نلاوع فقرنا، ونحتال على قلة حيلتنا ولو بالمفردات....!!! معقول صاحب السيارة هاي ماعليه قرض مرأة أو قرض بنك ما...معقول.. ولا كيف سبق سنو...؟ !!!!
