كشفت الفنانة منال سلامة عن الصعوبات التي يواجهها الفنانون في مهنة التمثيل، مؤكدة أن هذا المجال يفتقد للاستقرار والأمان المادي.

وقالت منال في تصريحات صحافية: 'الفن مهنة مفيهاش استقرار ولا أمان مادي؛ لأن كل يوم بيظهر ناس جداد والمناخ اتغير، والناس بتشوف الفنانين أجورهم عالية؛ ودا لأننا عددنا قليل ومصاريفنا أكتر من الشخص العادي، وممكن نشتغل سنة وسنتين لأ يبقى بيتنا هيتفتح منين؟

وواصلت: 'فيه مهن كتير مفيهاش أمان مادي ولا استقرار زي الفن، بس الشخص العادي لما بيركن عربيته السايس مش بيشوفه مليونير ولازم يدفع كتير، دا إحنا لما بنشتري حاجة بخمسة صاغ بتتحسب لنا بجنيه'.

 

وكانت منال سلامة، قد أكدت أن ابنتها أميرة أديب، كان من المقرر أن تكون من ضمن فريق العمل بمسلسل 'الأصلي' بطولة ريهام عبد الغفور والذي يعرض حالياً.

 

وكشفت أن ابنتها قررت عدم المشاركة لوجودها فيه، معلقة: 'أميرة سألتني أنتِ جالك شغل قولتلها أه مسلسل الأصلي، قالتلي أنا مترشحة فيه ومش هشتغله علشان هيقولوا إنتِ اللي مرشحاني'.

 

وتابعت قائلة: 'قولتلها يا أميرة الناس كدا كدا هيقولوا إني رشحتك للعمل، ومتغلطيش غلطتي أنا سنين طويلة رفضت أشتغل مع أسرتي وعيلة أديب وفي الآخر محسوبة عليهم'.