واحساافاه عليكي يا دنيا خسرتي انقى روح  واطيب قلب !!حتى الكلمات رح تخونني بالتعبير! 

طفلتك المدللة  رح تضل غصة بقلبها لآخر يوم في العمر 

بتعرف يابا ما عاد اشي اله معنى من بعدك ! 

بتعرف يابا قديش روحي متعلقة بروحك وقديش وجعي كبيييير ! بتعرف يابا انه بنتك ما عاد تضحك من قلبها زي اول  ! انتَ كنت سبب كل ضحكة وكل فرحة كنت افرحها . انت كنت الظهر اللي بستند عليه كل ما ضاقت فيّ الدنيا .

يابا  في عمري ما رح انسى شو كنت الي 

عمري مارح انسى قديه تعبت معي بكل فترة بحياتي . قديه عملت وسويت لتشوفني دكتورة وترفع راسك فيّ ! 

يابا قلبك ما يتعوض وحنيتك غير! ووعد مني الك لتضل رافع راسك فيّ لآخر يوم بالعمر . 

قديه هكلت همّي وساعدتني بكل شي 

كنت رفيقي بكل فترة بحياتي 

يابا يا حبيبي خلص رحت؟!! انا مو مقتنعة ولا مصدقة ولا عمري رح اقتنع انك رحت 

انت رح تضل عايش بروحي 

تفاصيلك يابا بروحي مرسومة

شعراتك وعيونك سنانك وضحكتك وغيرها كثير رح تذبحني على قد مارح اشتاقلها .

 

كل شي فيك يابا بعشقه وبحبه 

كيف يابا رحت وتركتني بهالدنيا 

كيف رح اقدر اكمل من دونك 

كيف رح اقدر افرح من قلبي بعد ما رحت 

فش حكي يعبر عن الألم والوجع وغصة الروح والقلب 

بس اللي انا متأكدة منه انه انا عمري مارح انساك وعمري مارح اعتبرك متت .

علاقتي فيك عمرها ما كانت بس علاقة بنت بأبوها 

علاقتي فيك علاقة روح بروح ولا حتى الموت رح يبعدنا عن بعض . ومثل ما كنت احس فيك وانتَ عايش ،حتى وانتَ بعيد عنّي رح اضل احس فيك ~حتى وانت بالجنة 

يابا يا حبيبي طول عمرك تهكل هم اني ازعل طب ليش رحت وزعلتني ؟ ليش رحت وعصرت قلبي عصر ! 

الدنيا خسرت انقى روح واطيب قلب 

يا حسافاه عليكي يا دنيا خسرتي كثيير وهالخسارة ما بتتعوض ! 

بعد وفاتك يابا استغربت كيف الناس بتحبك كلها وقديش طلعت غالي عناس كثييير ! الغريب تعب عفراقك كيف انا بنتك اللي كانت تعشق روحَك ! 

بس يابا الحياة طلعت احقر من ما بتخيل 

طلعت بتسواش اشي ! بلحظة بتحرمنا من ناس همه النا كل الحياة ! 

خسرت اكتر شخص كان بآمن فيّ ! كان دايماً مآمن فيا وانه ما في شي بيصعب علي 

ايمانك فيا هو السبب اللي خلاني اوصلل لكل شي بحياتي 

عزائي بحالي كبير والله  

عشان هيك يابا انا وصلت لكثير اشياء انت كنت بدك تشوفني فيها! اكتر شخص بآمن فيّ وبحبني حب صادق خسرته ! 

خسارتك كبيرة يابا ما بتتعوض...  

انا بدوّامة ما بعرف كيف رح اطلع منها 

وما الها حل الا انك تيجي عندي وترجع او انه اروح عندك وارتاح 

لما كان حد يحكيلك انه بنتك بتموت عليك  كنت ترد :اه بعرف انها بتموت علي وانا بموت عليها! 

انا بحبك حب ما حبه بشر لحدا ! 

الطب خانني يابا ما قدرت اساعدك اخر اشي ! ما قدرت احط قلبي مكان قلبك وما اخليه يوقف ! 

كل لحظه كان عندي امل حاولت اساعدك يابا . حاولت اني ما اتركك بس والله يابا الطب اللي درسته خانني وما خلاني اقدر اساعدك  اخر اشي !

سامحني يابا ! 

بدي الدنيا   كلها تعرف اني خسرت خسارة ب ٧/٣/٢٠٢٠ عمرها ما رح تتعوض ! خسرت رفيق روحي وسندي وضحكتي وسعادتي ... 

يا ناس انا كان عندي أُمّين! ابوي عنده قلب ام مش قلب اب بس ! كان يهكل هم كل شي ممكن يدايقني او يوجعني حتى! 

كان كل همه يشوف اجوان مبسوطة ومو ناقصها اشي ! 

طول ما انا كنت معه كان يحس بالآمان طيب كيف 

بدك تروح من دوني وما تخاف ؟!!! 

عيشتي بعزّك طول عمري وانا عايشة ملكة تحت عرشك ! يابا الدنيا طلعت غدارة كثيييير! غدرتني ! 

بس حتى لما متت لسا رافعين راسنا فيك كلنا بسمعتك وعملك الصالح اللي بيشهد فيه كل كبير وصغير. 

بس احكيلك اشي !قديه كنت اخاف عليك من نسمة الهوا اللي تمشي جنبك على قد ما تمنيت لو اني كنت مكانك كان اكيد الوجع رح  يكون اخف وعصرة القلب والروح رح تكون اخف ! 

 بلحظة خليتني افقد معنى السعادة بكل شي بالدنيا ! 

يابا ربي يرحمك برحمته  ياحبيب روحي 

انا بدي كل الدنيا تعرف اني خسرت اكبر خسارة في حياتي ! واني لأول مرة بالفعل بنهز من جواتي  

هزيتني يابا ... كسرت ظهري  والله 

كل شي بالدنيا خسرك حتى اربد وشوارعها رح تشتاق لنفسك ! 

يابا كل حكي الدنيا ما بعبر عن غصة قلبي وروحي بس احنا على موعد قريب ! 

قريب  جداً 

قريب جداً  

رسالة الى والدي الراقد في قبره

الحاج أحمد ظاهر علاونة ابو علاء 

فقيدن غالي يا ناس