كشف مواطن أردني أسلوب نصب إلكتروني جديد تعرض له من خلال التعامل مع أشخاص على الفيسبوك والتلغرام.

وتاليا ما كتبه المواطن:

السلام عليكم ورحمة الله وبركاته

اخواني الاعزاء اليكم تجربتي صباح اليوم مع أسلوب جديد للنصب والاحتيال!.

تحذير من اعلانات عالفيس بوك للعمل اونلاين وبكل سهولة وفقط عمل اكاونت وبتصير تربح فلوس حسب كلامهم فقط بالضغط على زر وتنفيذ عمليات شرائية وهمية.! 

أنا اليوم الصبح علقت معهم كونه الاعلان متعوب عليه ومبين أنه صحيح وللمتكلمين باللغة الإنجليزية فقط.! وكمان حسابات عالفيس والتلغرام بشخصيات أجنبية عايشة بالاردن.!

بديش اطول عليكم المهم تابعت معهم وعملت حساب ونزلت الغرام وأخذت التدريب حسب كلامهم ودخلت على مجموعة في التلغرام وشفت صور شاشة لتحويلات وعمليات ناجحة!؟  وطلبوا اني احول 7 دنانير عشان ابلش العمل، وفعلآ حولت والعمل كان عبارة عن تطبيق داخل جوجل كروم (صفحة) وأعطوني فرصة واحدة حسب دفعتي وربحت 4.56 وحولي اياهم.! 

بعدين بسأل النصاب/ة كيف اكمل حكتلي احول 30 دينار عشان اخذ مهمتين فقط عشان اربح 8 دنانير أو احول 60 دينار عشان اخذ 4 مهمات واربح 20 دينار، أو احول 100 دينار عشان اربح 50 دينار.! 

طبعآ يا اخوان خلاصة الموضوع اني قلبي نقزني عشان التحويل تم من شب اسمه سامر وبجوز يكون معنا هون وبحتفظ باسمه الكامل ورقمه للجرائم الإلكترونية.. وطلبت احكي مكالمة صوت عشان اتاكد من الشخص الي بتعامل معاه، وطبعآ قوبل بالرفض.! هون خلص تأكدت أنه نصب واحتيال وببراعة تكاد تقنع غالبية الضحايا.

وحبيت اشارك كم تجربتي عشان ما حد يوقع ويخسر فلوسه، والله من وراء القصد.