كتب فادي الكيلاني

إحنا عايشين بعمان لاننا بنحبها...يمكن عمان مش احسن مكان للعيشة...يمكن عمان ما في مصاري مثل الرياض...يمكن مولات عمان مش مثل دبي...يمكن شوارع عمان مش مثل شوارع جدة...يمكن اكل عمان مش بحلاوة مطاعم ابو ظبي....يمكن فوضى عمان وضوضاءها وازعاجها ودحشتها ومطافشتها ما بتحملها شخص عادي....

بس احنا بنحب عمان...بحلوها ومرها.. عشان هيك قاعدين في عمان...

لا تقولنا "كيف عايشين هون"..لا تقولنا "الله يعينكم"..لا تقولنا "شو هالزحمة شو هالسواقة شو النظام شو هالقرف"....لا تعطينا محاضرة في اهمية سيادة القانون ونجاح التجربة البريطانية في المدينة الفلانية....

لانك لما تيجي عمان بتنام على السطح عشان تشم هوا عمان...مستعد تضل للصبح عشان تلف بشوارعها....لانك لما تشرفنا بتوقف عند اول بياع ترمس وذراية... وبتكون متوحم على طابور شاورما ريم وبتستنى يوم الفطور في هاشم او صحن الكنافة من حبيبة....لما توصل عمان بكون نفسك تدخل على دكانة وتتفرج بصاحب الدكانة وتقوله "سجل على الدفتر" ولما تدخل فرع البنك بتحس حالك داخل على دارك....

بتركض على الشباك لما تسمع صوت سيارة الغاز...

لانك لما تيجي لعمان بتكون مشتاق تزروق بالسيارة وتخش على الدوار بطفاشة...بكون نفسك تفقع زاومير وتشوف زفة عرس مسكر الشارع....

بكون نفسك تحكي مع شرطي وتسلم على ضابط بالشارع...ونفسك بكشرة شباب عمان

لما تدخل عمان بترجع لحبك الأول...وبتتذكر كلمات الاغنية اللي بتقول "ليش الحب الأول ما برضى يفارقنا"

احنا في عمان بقصة حب اولى ولم يأتي بعدها حب...معلش اتركونا نتفاهم مع عمان....وسنترك لكم المجال ان تستمتعوا بعمان حتى لو لفترة...وتستنشقوا اكبر كمية من هواءها العليل... لتعودوا الى مدن المال التي لن تجدوا فيها عمان ولا هوا عمان....حتى لو تكدست كل الأموال.