بقلم حازم بشارة نايف الحجازين

الكل نايم غرقان وعند فجت الضو يحمل المنجل ومطرة الميه قوموا يعيال ودنا نلحق قبل الشمس ما تحمى علينا.

وش هازول ابو سلطان صباح الخير هلا ابو عبدالله وين صرتو بالحصيده مطولين هانت ان شاء الله كمن يوم منعمر بيدرها.

يلا يود شد حيلك قوم نايم ونت بتمشي يقطع الخلفه والي بخلفوها طل على عيال المختار سبقونا بعدنا اخر الناس مسخم العيل ما بفطن غير هو ناط مترين شالوت واحد بخليه طول اليوم مصحصح.

الكل مشغول بارضه يلي بحصد ويلي بغمر ويلي قاضب مكنسته للبيدر بجهز. 

هات الشعبه وعمر بيدرها اسبوع زمان الكل ضبضب غلتها  خزن قمحها وشعيرها والتبن للحلال. الناس ايام زمان مفيش بحق شوال قمح تمون دارها سكر ورز وسمنه وزيت وباقي المونه جميد وسمن والطحين من البابور ياخذ اجاره قمح ( رد). 

وين ما لتمو صار غداهم مافي دار فلان وفلان الكل عيله فرحهم واحد ومصابهم واحد. 

يلا يا مره خلصينا ودنا نلحق اصبر يرجل عنامك طرت ودنا نلحق التعليله هسا بتعللو على صوت الراديو يلا يلا قوم. راديو واحد بكل القريه وخاله ابو زيد يلي عنده راديو. 

يمسيهم بالخير يا هلا والله هان هان تعال لا والله غير هان يناس توكلو على الله الكل يضل محله 

الكل برحب وبهلي كانه بداره وصاحب الدار معزب. 

ابو سلطان صافن بكره راجع على المعسكر خلصت اجازته وده شهرين للاجازه الجايه كان العسكري كل شهرين ثلاثه يطل على اهله اسبوع زمان ومع الواسطه اسبوعين هاذي كانت حياتهم وقديش راتب الوحد ما يوصل ثلاث نيرات اضل يصرف منهم طول الشهر يعمي نعم في قل لكن الناس بخير ويين من الحول للحول تسمع واحد مريض او في حالة وفاه مثل اليوم بالدقيقه يذكر الك عشرين واحد. 

كثرت لمراض والبيئه ملوثه والاكل فاسد والله يعمي ايام زمان احلا. 

قوم قوم قامت قيامتك يا مالي الصيب خازق البطلون هو انا ضل في حيل ارقع ليك. 

لازم يكون في واحد نهفه بدار اختصاص نكت فقط يمه باسم رسب بالمتحان قال الاستاذ اعلمك 

روح تعال جاي الله يعين اذانه طولن من كثر الشد هههههه والك راسب بالمتحان لا تردي مين قال طول ورجيني يمه طلي هاذي عشرين صح اه صح وطلي هاذي ثلاثين صح صح طيب اجمعيهم خمسين يعني ناجح يه اه والله العيل ناجح ودي اقول عيالي غير شكل ذكيين ما شاء الله مو مثل عيالها نهفه نصب على امه. يمه يمه خير علامك وزعو علينا اليوم علب لحمه وجبنه طيب وينهن والله عملت عزيمه لصحابي ورا صور المدرسه طبعا قبل ما ينطق اخر حرف تلاقي ريالته لزقت بالحيط حفايه من لعيار الثقيل نمره سته واربعين لزقت بصباحه ههههههه اسبوع وخده مورد ما شاء الله ابنها خجول ههههههه. 

دبت الحصبه بالعالم مافي الها مطعوم والناس جاهله وبسيطه العيل يلي طبه حراره ويرجف يدملوه ودفوه لما يفقع من الحرار ويموت ناس مسكينه طب بسيط وامراض قليله واذا الواحد فقد عزيز مو مثل اليوم اسبوع زمان ولا كانه موجود الله يرحمه. 

كانو ايام زمان الحد من الحول للحول المره ترجع عدارها بعد الدفن عيالها ما يعرفوها من كثر ماهي مزعه خدودها بضافرها تلاقي القريه كلها لابسه اسود وكل ليله التعليله عند اهل العزا والغدا كل يوم على عيله الكل يد وحده محبه من القلب تسمع فلان زعلان او عتبان ما كانو يعرفو هيك كلام. 

بقلم حازم بشارة نايف الحجازين // للحديث بقية من ايام زمان (٢)