نيروز الإخبارية : نيروز الإخبارية ...بقلم د. عساف الشوبكي. واحد حكالي إنه شاف بالمنام قبل أسبوعين المطلوب (الرئيسي) على قضية الدخان عوني مطيع ومعه واحد متنفذ صاحبه جايين من دوله أوروبية وبعد ما نزلت طيارتهم طولوا بالمطار وقعدوا اكثر من ثلاث ساعات عبين ماطلعوا ، وبعد ما طلعوا ركبوا سيارة المتنفذ السوداء الفارهة وراحوا زي الطلق بعرفش لوين . وسألني الحالم بالك شو تفسير هالحلم ؟ فتشت بكتاب تفسير الأحلام لإبن سيرين رحمه الله، فلم اجد له تفسيراً، حيث لم يكن على زمن ابن سيرين دخان ولا طيران ولا سيارات، وأخبرته ان ذلك حسب علمي المتواضع عبارة عن (اضغاث احلام ) وأن عوني مطيع فار من وجه العدالة وقد صدرت بحقه مذكرة إلقاء قبض وجلب من البوليس الدولي (الإنتربول) وان الحكومة مصرة على كسر ظهر الفساد وعين خير يا قرابه. قالي والله العظيم شفته بعينيَّ الثنتين اللي بكرا بده يوكلهن الدود ، لا تضحك انا مش غشيم عن عوني هو يزلمه بشحمه ولحمه ولابس كمان بدله جديدة طخ تلمع لمع ، وحاطط محرمه بيضا بجيبته اللي ع صدره ، وعطره يفحفح من بعيد . وكان يحكي مع صديقة المتنفذ وبيقول : شو انا مع غيري يابو شريك ، انا صوص مع الضباع الكبار اللي زيك ومثلك وأكبر منك ( وشو الصوص وشي مرقته) حط بالخرج ، ترى انت أكثر واحد بيعرف إنه الدخانات مش الي أنا بس، كلها بتترزق الكبير قبل الزغير ، بعدين المحاكم الخاصة غير معترف فيها دولياً، ارتاح اتخافش . قلت لصحابي الحلمان : صح النوم وجعت راسي يا إبن الحلال بحلمك ، انا بقول والله أعلم ، طالما هدّت الطيارة بالمطار ونزلوا منها الشطار،،، إنتهت المشكلة ،وخلصت القضية ، وتلاشت الإشاعات المغرضة وخلصنا من موضوع إغتيال الشخصيات والصور والفيديوهات ولعنا ابو سنسفيل الفساد وطلع منها ابو مطيع زي الشعره من العجين، وخلي الإنتربول ابو ندهتين يجيب عوني وبطريقه يجيبلنا معه كمان المطلوب من زمان وليد الكردي. وتوته توته خلصت الحتوته. د.عساف الشوبكي